VIST. L’avètz vist lo noveu espectacle de Clamenç ? Après « Agachs », « Fintadas e Relucadas » l’òme a la valisa seguís sa dralha, agusa son agach e sa lenga. E gratussa, gratussa lo monde ont aquò lo prusis.
Lei «fans » vòle dire leis afeccionats, leis apetegats, lei badabecs, i tornaràn trobar la bassa-cort, lo galinier costumier amb son rei-petit, sei galinas e sei galiàs. Son totjorn autant vius, cresta-quilhada e abestits… Rai !
Pasmens la tropa galinièra, aqueste còp, sortís un pauc de sa bassa cort per assistar o participar a la memorabla « Ereccion pestilenciala » comentada biais competicion esportiva per un jornalista mai qu’avisat. Fasètz fisança, lei retrachs dei candidats son fidelissimes !
Mai la vida politica es pas tot, i a tanben la vida de cada jorn per cadun de nosautrei, i a lei pichòts servicis dichs publics coma lo de la Pòsta, aisits d’utilisar quora òm vòu ben seguir lei consignas e mai vos faguèsson virar en redond e tornan a la casa primièra… e puèi leis aisinas ostalièras que nos facilitan l’anar dei jorns, coma lo respondeire telefonic, seis suspresas e sei possibilitats. Tot aquò l’artista l’a ben VIST, espepissat, espinchonat e… melhorat !
Valisa en mans, coma de costuma, se’n va puèi, per un grand viatge, dins lo transsiberian, de Moscó a Vladivostòc.
Plan-pissa e curiós coma una agassa profiecha de tot, de sei vesins de viatge, de sa ò sei lengas – del temps que fa petar la sieuna – e profiecha de nòstra atencion badarèla, ò de nòstra desatencion per nos faire resquilhar dins una absurditat bauja ont lo Clamenç en scèna rescontra pas que de Clamençs imaginaris.
Risèm totjorn, mai lo rire vira un pauc al jaune. S’entragacham l’uelh interogatiu e vueje, coma uelh de galina. De qué vòu nos dire lo galejaire ? Critica de l’Artista e de son narcissism fondamentau ? Absurditat d’un monde que vira en redond e s’agacha l’embonilh ? Convit a se laissar pas enganar ? Mai galeja ò pas ? O nos vòl faire galinejar ? Cadun se trobarà sa responsa ò tornarà veire VIST per lo rire, la lenga, la vida e aquel artist calorent e generós que nos fa gaug en aquela passa un pauc griseta.
Danielle JULIEN